Sarkin Musulmi kuma Shugaban Majalisar Sarakunan Gargajiya ta Ƙasa (NTRCN), Mai Martaba Alhaji Muhammad Sa’ad Abubakar, CFR, mni, ya bayyana bakin cikinsa kan rasuwar Olubadan na ƙasar Ibadan, Oba Owolabi Olakulehin.
A cikin wata sanarwar ta’aziyya da Sakataren Majalisar Sultanate, Alhaji Sai’idu Maccido (Danburam Sokoto) ya sanya wa hannu a ranar Litinin, Sarkin Musulmi ya bayyana marigayin a matsayin “jagora nagari, wanda tunaninsa da aikinsa suka kasance manya kuma masu kyau.”
“Ko da yake mulkinsa bai dade ba bayan hawansa kan gadon sarauta, ya bar kyakkyawan tarihi da abin kwaikwayo mai ɗorewa ga Ibadan da ma Najeriya baki ɗaya,” in ji Sarkin Sokoto.
A madadin kansa da Majalisar Sultanate ta Sokoto, Sarkin ya mika ta’aziyya ga Gwamnatin Jihar Oyo, iyalan marigayin da kuma Olubadan-in-Council. Ya jaddada cewa gudummawar da marigayin ya bayar wajen ci gaban ƙasar Ibadan da kuma jin ƙai ga al’umma ba za su taɓa mantawa ba.
“Rasuwar wannan babban sarki ta bar gibi da za a ji a ko’ina,” in ji Sarkin. “Duk da cewa ya yi shekara ɗaya kacal kan gadon mulki, jajircewarsa da soyayyarsa ga al’ummarsa za su ci gaba da daɗaɗa a zukatan mutane.
Sarkin ya kuma yi addu’a domin Ubangiji ya ba iyalan marigayin da mutanen ƙasar Ibadan haƙuri da ƙarfin zuciya wajen jimre wannan babban rashi.
